محضر تــحــقــيـق في هاك الحـــكــايـــة الــــشــنـــوازيـــة ... بالبلادة التـــونــســيــة

الــجمهورية الـبـلوغـوسـفـرية الديما...ديما...قراطية

وزارة الـتـنـطـيـق بالسيف
الفرقة المركزية الأولى للأبحاث والتــنـسـنـيس

نحن البحّــاث الـنسـناس الأوّل " فلان الفولاني " رئيس مدير مركز " التـنـطـيـق بالـتـمـجـليق و التعـذيب بالـتـبوريـب ", حضر لدينا اليوم 07 ماي 2008 و على الساعة 13:45 المتهم في قضية الحال المدعو "بالملوان", وبعد إستنطاقه بالطرق السلمية والإنسانية صرّح لنا بما يلي :
حيث أنّه, و حسب أقواله, و بتحريض من , المدعـو " الدوعاجي", و المدعـوة "اللص رقم واحد" , و المدعـوة " أكـسـكـيزا" و بسابق الإصرار و الترصد من المدعو " أزواو"... أقدم المدعـو بالمــلــوان على فعلته المشينة هذه.

س/ج : سي بالملوان كان جيت سُــجــرة آش تكون ؟ : كان جيت شجرة راني "كلتوسا" ... خطرها ما يزيش طويلة و هايجة, زيد إنت تقصّها و هي تعاود تطلع, راسها صحيح و مكبّــشة كي الــفــقــر, وزيدك زيــادة كي تـشـعّـل فيها الـنـار تـلـهـب حتى وكانـهـي خضرا

س/ج : وكان جيت ماكـلـة آش تكـون ؟ : كان جيت ماكلة راني "طـبـيـخـة" ... ديجا إسمها يشـيـخـني, يقـلك فلان كلا طبيخة في طرح الشـكـبـة, و الإكــيـب الفلانية كلات طبيخة فالـكـمـرون, وزيد زادة تعجبني الطبيخة شكلا و مضمونا, منضرها مزيان ومكوناتها هايلين, هي شد عندك هي, فول و فول مصري (على ذكر الفول المصري, ديما نسأل في روحي زعمة في مصر آش يقولولو ؟ فولــنا !!!!) وعدس نوعين و لوبيا شايحة و حمص منفخ و قرع أحمر و ثوم و قديد ... الكلّها حديد في حديد, و بحكم خدمتي فإنّو الحديد حاجة مهمة يااااسر بنسبة ليّا (للعرص و صبّان الصّبة) ... (ملاحضة : الدكتور حكيم ينصحكم باش ما تكلوش الطبيخة وتشربو بعدها الماء طول ... مكانش الحديد اللّي كليتوه الكل يصّدد). ه

س/ج : هاك حتى إنت باش تصدّد (في إيديك المونوت) بحذانا حتى لنهار الأثنين الجاي نشاله هههه ... باهي و كان جيت نوّارة زعمة آش تكون؟ : ما أنجم نكون كان نوّار دفلة فالواد عامل ضلايل ... خاطر ما يعجبني زين الطفلة كان ما نشوف الفعايل

س/ج : و كان جيت قرية و إلاّ دشرة و إلاّ حومة آش تكون ؟ : "سيدي جمور" في جربة (نشاله يطيح فيك !!!!) بلاصة كي نمشيلها ننسا الدنيا و ما فيها ... و زيد عندي فيها برشا ذكرايات ...ه

س/ج : برشا ذكريات آآهه !!! غادي كانت تجتمع الخلية التخريبية متاعكم آآهه !!! باهي واصل واصل ... و كان جيت يا سي الذكريات قصيدة أمّا قصيدة تكون ؟ : "طاطي راسك طاطي طاطي إنت في وطن ديموقراطي" متاع الفجومي أحمد فؤاد نجم ... خاطر بعد ضيافتكم هاذي, الله يكثر من أمثالكم الناس, تأكدت ميا فالميا الي أنا في وطن ديموفراطي والحمد لله

س/ج : زيد تضومر زيد !!! باهي وكان جيت شخصية تاريخية يا سي الديمو آش تكون ؟ : راني الحجّاج إبن يوسف الّي قال" يا أهل العراق, يا أهل الشقاق و النفاق, إني أرى رؤوسا قد أينعت و قد حان وقت قطافها ... فو الله إنّي لا قاطفها" ... و أنا نقول في نفس السياق " يا معشر التونسيين, يا معشر القفة و البندير والطحين, إنّي أرى فيكم السارق والمرتشي و القفاف والزنديق البو وجهين, فو الله إنّي لا فاضحكم, قاطع اللّسان مكسّر السنين

س/ج : و كان جيت شخصية خرافية ؟ : راني " موضف في إتصالات تونس يخدم بضمير" ه

س/ج : و كان جيت شخصية قصصية آش تكون ؟ : كان جيت في قصّة راني واحد من ثنين يا إمّا
Papillon
بابيون متاع الكاتب الفرنسي "هنري كاريار", نحب الحرية و نعمل المستحيل لتحقيقها و كان لزم نموت من أجلها
يا إمّا
"هومار سيمسون" متاع "لي سيمسون" باعث الدنيا و ما فيهاااا

س/ج : صحيت يا مـتـثـقـف !!! إملا قــلــّي كان جيت حيوان راك فرططو كيما هالي تحكي عليه ؟ : لا لا !!! كان جيت حيوان راني بدون أدنى شك "كلب عربي" فــالــنــبــيــح نقلك هاني هنا الفم ديما حارك ... أمّا الفعل يجيبو ربي

س/ج : آآآههه هذي جبت فيها ... و كان جيت صياغة آش تكون ؟ : ما خيرش مال "مونوت" كي تبدى ملبوسة في زوز يدين

س/ج : هذاكا علاش باش نخليوهالك حتى أحنا ... و كان جيت لباس آش تكون ؟ : "كبــوت" ... كلمة معــبـرة يـــــاسـر و عندها برشة معاني ... يقلك كـبـوت ترافل في طرح البولوط ... ويـقـلـك ستعملت كبوت أنـقـلـيـز في هاك القضية مـفـوح بـالـفـراز ... و فلان طاح عليه كبوت الكرهبة فسّدلو وجهو ... و يقلك هذاكا شـسـمو كلا كبوط في بابـور البانان الّي جابــو ... إلخ

س/ج : هاو هذاكا شسمو باش يشيخك بهاك القضية ... باهـــــــي, و كان جيت ريحة آش تكون ؟ : تـعـجـبـني ياسر ريحة الفرمونتاسيون متاع الشعير الّي تبدا خارجة تفوح من معمل البيرة في باب سعدون, كي كنت نقرا غادي ياااا حسرة

س/ج : إمالا شقولك كان نقعــــ...آآآآآهههه...نضيفوك على كعبة بيرة !!!! وكان جيت موقع آش تكون ؟ : تركينة رايضة في جيور إنفرادي في سجن "رجيم معتوق" ياااا ناعــما (الله لا يوريه لحبيب)

س/ج : هيا تعرفشي كيفاه يا رْمز ... بالحرام لو كان ما تصبلناش الصبة بستة (على الأقل) من جماعتك في هالمخطط الجهنمي متاعكم, باش نجيبو نضيفوهم هوما زادا بحذانا ... إلاما نـبـعـثوك تتضيف فيه "رجيم معتوق" و غادي تشيخ بالبيرة مالبلايص الكل بلاش كبوت أنقليز وإنت لابس هاك الصياغة الي تحب عليها, الكلاب العربي و السوري الكل دايرين بيك و كانك راجل أعــمل كيفو "بـابـيون" متاعك و حاول تهرب منّو الحبس ؟ : يا سيدي باش نصب ب :
-حاكم النرمال لاند : هذاكا السبب فالإنقلاب الي صار في موريتانيا, والأوضاع في درفور, إرتفاع أسعار المحروقات
-أستوسا : تنضم في إجتماعات غير مرخص فيها
-الشنفرة : يعمل في نشاطات مشبوهة خارج الوطن تضر بـعـلـقاتـنا مع الدول الـشـقـيقة والصديقة
-نوفراج : تروّج في مناشير فنية
-كـيـبـيـتـز : يستعمل في مصورة في أماكن يمنع فيها التصوير بتاتا
-دليدا: تعمل في برشا بناء فوضوي

زيد صححـلي تحت الجملة هذي : " أشهد على صحة أقوالي هذه, التي أدليت بها في كنف الحرية و بدون أي ضـغـوط أو إجبار, و أني طوال هذا التحقيق لم أتـعـرض لأي إهانة أو سوء مـعـاملة" ه

المضـنـون فيه
بالـــمـــلــوان