توه مدة وأنا نعاني من عقم تدويني فادح٬ تلمت عليّا خدمة و مشاغل عائلية و خاصة بخل تدويني (الله لا تربحو!!!)، الحكاية هذي بدات فالصيف مبين سهرية و بحر و خدمة و عروسات و مرواح للبلاد, معادش تلقا الوقت حتى باش تحل الأرديناتور ... يكمل يخلط عليه رمضان و كل ما يتبعو من بخل و إنحلال فالنهار و سهريات فاليل ... لين الواحد ستانس بهاك التركريكة متاع المؤسسات الديمقراطية (كيما يقول توفيق الجبالي) ومعادش لاهي بالتدوين خلاص, ووفا رمضان والعقم التدويني ما حبش يوفا لين وليت نحس في روحي مقصّر ما نعرش في حق شكون, أما حاشم على روحي و أكهو ... نقول الناس الكل قاعدة تكتب و تعبروتنقد وتمدح و تندد وتتتتت ... وأنا نحس في إديا مكبّلة و مخي ناشف كي الصحراء الكبرى ... نسخايل روحي وحدي في هالمحنة ...
علاش مش نهار السبت الي تعدى نتفاهم أنا و الفري رايس (الي هو زادا يعاني تقريبا من نفس المشكلة) نهبطوا لتونس باش نحضرو للإفتتاح متاع "أيام قرطاج السنمائية" , وبالطبيعة حضرنا !!! هههههههههه ... (خليني ساكت خير ... هاك الحيط متاع برلين و التعزيزات الأمنية الي عملوهم كيلوماتر على المسرح البلدي يلزمهم مدونة وحدهم !!!!!) ... حسيلو قعدنا في قهوة مش بعيدا عالتياتر نشوفو بعينا و نموتو بقلبنا كيف الدخول للمسرح ولا كيما الدخول للجنة... و رُبَ صدفة خير من ألف ميعاد نتقابلو مع مسيو و مدام "قصة أونلاين" وعدينا سهرية نتصورها خير ببرشا من لوكان دخلنا للإفتتاح ... الحسيلو فتكم بالحديث ... من بين ما حكينا جبدنا على هذي حكاية العقم التدويني الي نعانيو منها و أكتشفت الي مش كان أنا نعاني من هالمشكل وجينا نحسبو نلقاو الي برشا مدونين عندهم مدة طويلة غايبين عالساحة البلوغسفيرية (بدرجات متفاوتة) وخرجنا بإستنتاج الي ممكن ياسر متفاهمين على إضراب جماعي شكون يعرف !! هيا سيدي هي شدو عندكم ... وهم الأتي ذكرهم :
كيبيتز: هذاكا نسيت وقتاه آخر مرة كتب فيها
أكسكيزا : أحرف مني !! :)
برباش: من رمضان وروعة "حومة البلوغسفير" ما ريناهش, و على حد قولوا هو طارتلوا النفحة من جرت عباد ما تحشمش على رواحها
قصة أون لاين: لاهي في مشاكل كتابو و يدهن فالحانوت
وليد بن عمران : جاب ربي تونس لعبت معا فرانسا بش عمل طلة
القوفرنور متاع نورمالاند : كي هلال العيد !! هور سرفيس هالمدة الكل
أستوسا : فرد ريتم هيا والكيبيتز ... عمل فيها الفايس بوك
نوسترا : يضهر مرة في تبت يدا
أزواو : مالقلائل الي قعدو يكتبو , يكملو يبيراتيولو المدونة !! (الله يهلك من كان سبب)
جاكوب : قليل ياسر
نوفراج : بدرجة أقل ... أمّا توحشنا كتيبتها
الشنفرة : أنقرض بالحق كيفما الشنفرة, يعمل طلة بعد قداه كيف هلال العيد
مريومة من باريس : تكتب لكن مرت بفترة فراغ تدويني بريتم طايح
طارق : بخلاف مقلاتو متاع جريدة العرب ... عندنا مدة ما قرينالوش حويجة فالصميم
الدوعاجي : بدرجة أقل أمّا الريتم طايح موش كي العادة , يمكن البرد غادي عامل فيه !! هههههه (مش صحيح الدوعاجي قاعد يكتب أما جوست حبيت نجبد معاه الشبوك ههههههههههه)
البيق تراب بوي : غايب عندو مديدة
كلندستينو: والله وليت شاكك الي هو حرق بالحق !!!ه
براستوس: دراوين غبر!!!
حسيلو ... والقائمة تطول و تطول ...
ايه عاد قلنا علاش ما نلموش رواحنا هالمدونين "المضربين عن العمل" و نعملو جلست عمل على دائرة مستديرة اناقشو فيها تردي الوضع التدويني متاعنا ... هيا مالا كل حد يقترح وين باش نعقدوها هالقمة (نعقدو دينمها 60 عقدة كي متاع النشرة الجوية !!) و يقترح تاريخ زادا ... فماشي ما نعلقو هالإضراب متاعنا.
PS :راهوا الدعوة مفتوحة للأصحاب الكل الي يهمهم الموضوع والي قعدين على الأقل شادين شوية ريتم متاع كتيبة كيمة أختنا عرب و خالتي هناني (يعطيهم الصحة) ...
هيا نستنا إقترحاتكم فالتعاليق
