أجبد مالجابية و حط فالخابية

Chargement...

mercredi 25 mai 2011

دومينيك ستروس كان, عماد الطرابلسي و سياسة المكيالين

الحدث الأبرز لهذا الأسبوع في الصحافة العالمية كان اعتقال السياسي الفرنسي و مرشح الحزب الإشتراكي الفرنسي للإنتخبات الرئاسية لـ 2012 و رئيس الـ "اف ام اي" دومينيك ستروس كان, على خلفية تهمة تحرّش جنسي على عاملة تنظيف في أحد نزل الولايات المتحدة الأمريكية ... و بغض النضر عن مضمون القضية و مدى صحتها من عدمه, فإن أكثر ما أثار انتباهي هو الشكل في التعامل مع المتهم.
قداش الأمريكان طلعو قلوبهم كحل و ما يعرفوش يتصرفو مع الشخصيات المرموقة !! تي شبيهم ما يتعلّموش من عندنا شوية تسامح و عفى الله عن ما سلف و مصالحة وطنية و نضرة إلى المستقبل و كذا !! توّا معقول يا رسول الله رئيس "صندوق النقد العالمي" يمرمدوه بالطريقة هذيكة على جرد, كيفاش يقولوها, "نزوة عابرة" !! في حين أنّو أقل رئيس مصلحة في أقل إدارة صيد الفراشات عندنا يعمل أكثر من هكّاكة ببرشاااااااااا ... يا عاملات تنظيف يا سكريتارات ... إلخ ... إلخ ... و عاد اش بيه ... !! بصراحة ياسر ياسر ياسر يطبقو فالقانون الأمريكان, ماهيش عيشة هذي !!! كل شيء بالقانون كل شيء بالقانون !! وزيدك زيادة يتطبق كيف كيف على الناس الكل !! علاه هكة علاه ؟؟ تي صوابع يديك موش قد قد !! ما عندهمش شكون يعرفو وإلاّ شكون يكلمو ؟؟ لا حول الله قداش متأخرين فالأمور هذية !!
يا سيدي أخطانا من المضمون, تقول أنت الراجل عندو محنة النساء و موضوع حسّاس و دقيق وكذا ... هات نشوفوها من الناحية الشكلية أكهو و خلي ناخذو مثال بسيط هكة ما إيلو معنا ... مثلا مثلا ... آآه تيان !! عماد الطربلسي مثلا ... تراه خلي نعملو مقارنة صغيرة : اكتشف الفوارق السبعة بين الصورتين !!


 
صورة من الأنترنات مجهولة المصدر: دخول عماد الطرابلسي للمحكمة


صورة من الأنترنات مجهولة المصدر: دخول "ستروس كان" للمحكمة

شوفو قداه الأمريكان متخلفين فالمعاملات, الراجل بالمونوت و إيديه وراء ضهرو !! شادينو واحد منا و واحد منا كيف المجرمين الكل !! اللحية مسيبة !! حتى عقاب كرافات لا !! و مبعد هزوه ديراكت للحبس مع بقية المجرمين و الخلايق في شمبري فيها عشرين رقبة !! علاه هكة علاه !! شوفو أسيادكم في تونس و تعلمو آداب حسن الضيافة ... أحنا سي "عمادنا" ما نلبسوهش المونوت عيب ما يجيش ياخي هو الّي يجي !! على طرف سرقة فلوس و شوية زطلة و ضربات قتل ما إيلهم معنا نقومو نهنتلو فيه !! لحيتو محجمة شعرو بالجال نظيف عفيف يعمل الكيف و الإبتسامة تعلو محيّاه !! و يجيش منو يدخل يقابل القاضي بلاش كرافات !! يا سيدي علاش !! حتى من الجماعة الي شادينو ما يحبوش يشلقو باش ما يشوهولوش سمعتو, اهوكا زعمة زعمة, عالعنين و براه, يحميو فيه و حاطين يديهم على كتافو و زعمة صحاب و كذا !! و حتى كيف قلقوه شرذمة من المندسين (الّي ما يعرفوش شمعناها آداب معاملة الشخصيات المرموقة) داخل المحكمة بالحس, و قّفنا المحاكمة و رجّعنا سي عماد لدار الضيافة متاع العوينة (ما نتخيلش في زنزانة عادية متاع الي يجي !!) و المحاكمة الثانية تلعبت بدون حضور جمهور, أقل قلق على سي عماد. لا و أكثر من هكّة في حسن الضيافة !!!! أهوكة تو قريب الشهر من ما عاودناش قلّقناه, خلّي الراجل يرتاح في عقلو !! ياخي مزروبين عليهم أحنا هاك ال 18 قضية !!
زايد يقعدو ديما متخلفين هالأمريكان في أمور المعاملات و حسن الضيافة.

lundi 16 mai 2011

!!!!!! كفانا يا أخي كفانا من حوادث المرور




عندي مدّة طويلة وأنا نحب نكتب مقال و إلا تدوينة على الوضع الكارثي  لحركة المرور في تونس و خاصة فالعاصمة, حرقان ضوء, عدم إعطاء الأولوية, سرعة مفرطة, سياقة فالاتجاه المعاكس ... و الأمثلة كثيرة ... و بالفعل بديت نعمل فالتحقيق و نلم فالمعلومات و التصاور و الفيديوات على التجوزات الفضيعة الّي نشوف فيها كل يوم, و لقيت الّي الموضوع كبير ياسر و متشعب أكثر ملّي كنت نتصور ... الحقيقة تخليت على التحقيق هذا في أواخر شهر ديسمبر 2010 مع بداية أحداث الثورة و تلهيت كيما الناس الكل فالموضوع الأهم وقتها, و مع حلول 14 جانفي كنت نتصور الّي الوضعية فالطريق باش تتبدل بعد كل ما أظهره التوانسة من لُحمة وطنية, وإنكار للذات, و احترام للأخر خلال الثورة ... لكن ما راعني إلا أنه العكس هو الّي صار, الهمجية زادت, العصب كثر, الأنانية ولّات هي الكل, ما تقفش والا ما تتعداش من بلاصة من غير ما تسمع صوت الكلاكسون الي ما يسكتش ... الحاصيلو عقلية "نفسي نفسي لا يرحم من مات" زادت تغلغلت فينا بعد 14 جانفي على عكس ما كنت نتوقعو... كنت نتصور الّي التسيب هذا موجود على خاطر التونسي بخموس وإلا عاشور وإلا ساعة ساعة حتى بتاليفون  يعرف الي هو يسلك أمورو ... و اليوم زعمة علاش معمّلين ؟؟ الممارسات هذي مازالت متواصلة في "دولة القانون و المؤسسات" الّي طال ما سمعناها ؟؟؟
هاني ليوم نتحمل فالعواقب متاع التسيب هذا ... نهار السبت الي فات, تعرضت لحادث مرور فالطريق الوطنية رقم 10 بسب عدم امتثال سيارة تسوق فيها امرأة (الله يهديها و يسامحها) لإشارة الضوء الأحمر ...و من ألطاف الله خرجت أنا و عائلتي بأخف الأضرار و منعنا و الحمد لله مالي كانت تنجم تكون كارثة (بفضل حزام الأمان)... الأضرار مادية فالسيارة أكثر من كل شيء... واليوم ولّيت نتساءل أكثر و أكثر, علاش وصلنا للوضع هذا من التسيب في احترام قانون الطرقات ؟؟ ياخي للدرجة هذي يقلّق ؟؟ ياخي للدرجة هذي التونسي أناني ؟؟ ياخي للدرجة هذي المهندسين الّي عملوه غالطين و الّي المرا هذي تعرف خير منهم و تصلحلهم ؟؟؟ شنوة تنفعني أنا كلمت " سامحني " الّي قلتهالي بعد الحادث ؟؟ ... و لو كان لا قدّر الله صارت مصيبة في حدّ من عائلتي شنوة ذنبي أنا و الّا شنوة ذنب اي مواطن ماشي على روحو رايض فالطريق و "يجيك البلى يا غافل" ؟؟؟
ضاهرلي مسألة قانون الطرقات و احترامه أصبحت اليوم من أولوية الأولويات ... زعمة هذي ماهيش من "هيبة الدولة" كيف ما قال سيدنا ؟؟ ... ايه نعم من هيبة الدولة و نص ... يضهرلي المسألة هذي يلزمها بالحق تطبيق القانون بكل حزم, الردع الردع ..., أنا مع أنو تتسلط على مخالفي قانون الطرقات أقصى أنواع العقوبة و خاصة المالية منها (و التونسي ما تردعو كان الفلوس) و تنجم توصل حتى لـالتهمة بمحاولة القتل في المخالفات الخطيرة كيما حرقان الضوء الأحمر... وينهم هاك البوليس السياسي الي قالك تنحاو ؟؟؟ علاش ما يوليوش فالمرور ؟؟؟ ولّا تطبيق القانون كان عالي يتكلم و يخرج في مظاهرات ؟؟ ... "أسفي و ألمي كبيران عالي قاعد يصير في كياسات تونس !  أنا فهمتكم ! فهمت الجميع ! فهمت البوليس السياسي و أمن الدولة و الصبابة ! سيحوّلون كلهم إلى السركيلاسيون و شرطة المرور بكلّ حزم ! قانون الطرقات سيكون هو الفيصل ! ... يزي من حرقان الضو الحي ! المشي فالكونتر سونس ما عندوش مبرّر ! درن درن التليفون يرن فالكرهبة ماهوش مقبول ! أنا ما نقبلش حتى قطرة دمّ تونسي تسيل جرّة السرعة المفرطة و الأكسيدونات ! غلّطوني غلّطوني هاك الي ياقفو فالدزيام و تروازيام بوزيسيون أنا مانيش رادار باش "نشغبخنسحقفع" على الجمهورية الكل"
أنا قررت انطلاقا من اليوم بش نكتب كل أسبوع تدوينة على مظهر من مظاهر التخلف فالسياقة عند التونسي و المظاهر هذي ألوف مؤلفة, من ضوء, لفسح مجال, لترك أولوية, لسرعة مفرطة, لسياقة في حالة سكر, لسياقة على جانب الطريق, لاستعمال الهاتف, ... والقائمة تطول ... لعلّها تكون عبرة لمن يعتبر, و إلى حد الآن مازال عندي أمل فالتوانسة أنهم يبدلو شوية من عاداتهم فالسياقة راهي ما تنجم تكون كان مظهر من مظاهر التحضّر.

jeudi 27 mai 2010

Censure et sécurité économique

Le Conseil des ministres qui s'est réuni, ce mercredi 19 mai 2010 a examiné un projet de loi complétant les dispositions de l'article 61 bis du code pénal, par l'ajout de mesures aux termes desquelles sera sanctionné tout tunisien qui établit délibérément des contacts avec des parties étrangères pour inciter à porter préjudice aux intérêts vitaux de la Tunisie.
Sont considérés comme intérêts vitaux du pays, tout ce qui touche à sa sécurité économique.
D’après le communiqué officiel , « Ce projet de loi s'inscrit dans le cadre du renforcement de la protection des fondements de la sécurité économique, dans le contexte des mutations que connaît le monde et de ce qu'elles impliquent comme préservation des intérêts vitaux de la Tunisie contre toute forme de violation.
la protection des intérêts vitaux de la Tunisie contre toute atteinte ou violation est une responsabilité nationale qui s'impose à tout tunisien, compte tenu des évolutions que connaît le monde et qui ont consacré la dimension économique en tant que priorité essentielle dans la consolidation des fondements de la stabilité et de l’invulnérabilité ».
Il est clair d’après les termes de cet amendement que l’objectif est de sanctionner certains militants des droits de l’homme qui ont participé ces derniers temps à plusieurs manifestations notamment en Europe est ont pris la parole entre autre devant les députés européen pour dénoncer les entraves à la liberté d’expression et l’état des droits de l’homme en Tunisie.
Les discussions en cours entre la Tunisie et l’union européenne pour l’octroi à la Tunisie d’un « statut avancé » et le ralentissement que semble prendre ces discussions ne sont certainement pas étrangers à ce projet de loi.
Les motifs invoqués par le communiqué du conseil des ministres pour justifier les amendements prévus concernent essentiellement la protection de la sécurité économique
La décision du conseil des ministres motivé par l’évocation de la sécurité économique a coïncidé avec le mouvement de protestation contre la censure sur internet.
Cette coïncidence des calendriers est de nature a évoquer dans l’esprit des observateurs L’atteinte aux intérêts économique du pays que pourrait constituer la censure sur la toile et le verrouillage de l’accès aux sites d’échanges les plus populaires dans le monde tel que DAILYMOTION , YOUTUBE ….. en effet, La censure "représente une barrière réelle pour la communication" et une entrave certaine au commerce sur la toile (Voir l’article ci-joint) en plus de ce qu’elle représente comme atteinte aux droits du citoyen à l’accès à l’information et à la connaissance .
Aujourd’hui , un débat s’installe sur l’opportunité de porter les conflits relatifs à la censure sur internet devant les instances de l’OMC en sa qualité d’organisation internationale garante de la liberté du commerce , l’UE a déjà entamé une procédure à l’encontre de la chine , le résultat d’une telle démarche est encore incertain , mais qui sait ? Avec l’importance que prend de plus en plus le commerce sur internet, l’OMC finira par se saisir du dossier et AMMAR 404 se retrouvera alors dans la position des personnes qui portent préjudice aux intérêts vitaux de la Tunisie et à sa sécurité économique.

Par Maïtre Sami BELHADJ

vendredi 25 septembre 2009

علاش ؟؟؟؟؟؟



علاش في الرديف عباد هزّلها ديارها الواد ... و في بلايص أخرى عباد جايبا ديارها مالواد ؟؟؟؟؟

علاش في الرديف الديار طاحت بالمطر ... و في بلايص أخرى الديار طلعت بالماطري ؟؟؟؟؟

علاش صحافتنا تقول عالفيضنات "أمطارغزيرة تتهاطل" ... وعلى الي نشوفو فيه كل يوم ما تقولش " فلوس وسيارات تتـ...هامر" ؟؟؟؟

علاش صحافتنا تقول عالفاجعه "أمطارغير متوقعه تـُسقـِط المنازل" ... وعلى الي نشوفو فيه كل يوم ما تقولش " أوراق غير موقعه تبني المنازل" ؟؟؟؟

علاش في الرديف 2008 قالو على المطالبة بالحق في التنمية "شغب" ... وفي الرديف 2009 كي ضهرت حقيقة التنمية قالو "عجب" ؟؟؟؟

علاش الرديف حوض منجمي متاع فسفاط أكهو ... وبلايص أخرى منجم فلوس متاع سقـّاط أكهو ؟؟؟؟

علاش في الرديف بالضو مات هشام وبالماء ماتو عائلات (وهوما مخلصين فاتورات ماءهم وضوهم !!) ... و في بلايص أخرى بالضو تعملو بواتات وبالماء تعباو بيسينات (من غير ما يخلصو شيء!!!) ؟؟؟؟

علاش فالرديف القمم ما تبلعش الماء ... و في بلايص أخرى القمم ما تبلعش كان فالماء ؟؟؟؟

علاش !!!!!!!!!!!!!!!

lundi 18 mai 2009

Solidaire avec "3amrouch" et contre toute censure

تضامنا مع عمروش ... وضد كل أنواع الحجب ... ننشر التدوينة الي تحجبت على خاطرها مدونته !!!! وهذي مرة أخرى نقولو فيها و نعاودو ... "سيبو المدونات يا حيونات!!!" ... ه




لكل من طالب بالدليل على عملية شراء فيلا كندا








لكل من طالب بالدليل على عملية شراء فيلا كندا
وهذا موقع الجريدة لمن اراد الاطلاع

http://www.westmountindependent.com/WIv2.10.a.pdf

regarder la page ( page 10) vous trouvrez bien le prénom de la personne concerné

المؤسف اكثر انه حسب الجريدة اشتريت بمبلغ مضاعف اي اكثر من ثمنها بمرتين

mercredi 28 janvier 2009

WANTED ... مجرم حرب مطلوب للعداله

أتّـفـق تمام الإتفاق مع "قصة أونلاين" على وجوب التتبع العدلي لمجرمي الحرب هؤلاء ... رغم تأكدي من أن الضغط الأمركي على القضاء العالمي سيحاول قدر الإمكان أن يحول دون ذلك !!! لكن دعنا ننشر صور هؤلاء المجرمين فإن أمريكا لن تستطيع الضغط على التاريخ !!!ه
























ايلان مالكه ilan malka آمر لواء المشاة


























ايقال سلوفيكygal slovik آمر لواء 401 للمدرعات

































حرزي حاليفيherzy halevy آمر لواء المظليين

vendredi 26 décembre 2008

Champignons mauve ... فقاع قزوردي




يبدو أنو موسم الفقاع (الشمبينيون) بدا على بكري السنا ... بالرغم الشتاء والطقس البارد هاهم طالعين بارتو فالبلايص الكل و خاصة في تن ـ بلوغ.
بعد سي القزوردي ... هاو طحت اليوم بواحد آخر فاضت عليه الوطنية (الي بالمناسبة أحنا ما عندناش و ما نعرفوش حتى آش معناها) ... هو صحيح كي تجي تشوف البروفيل متاعو, ما ينجم يوحيلك كان بالـ "وطنية" الفياضة
برا أكتب يا خويا و ربي يجيب القسم

jeudi 18 décembre 2008

!!!!!!!!!!!ملاّ تخلويض

التدوينة هذي كانت فالأول تعليق رد ا على تعليق خونا "نوفل مصري" الي سمح لروحو باش يعلق على تدوينة (هنا) متاع عاشور الناجي, رغم الي هو مسكّر عندو باب التعليق ... (تعليقو كان هذا : " موش نرمال كل ها الكراهية للتجمعيين ")

يا مرحبا يا مرحبا بسي نوفل !!!!!!!
نشكرك على تواضعك و ردك ولو بكليمة على كل ما تكتب (والله هنيتنا تحيرنا و تفجعنا عليك ... قلنا بكشي المسكين أصابو مكروه و إلاّ مسيكن ما يسمعش و ما يشوفش !!!!) ... رغم أنو ردك لا يسمن ولا يغني من جوع ... أما أهوكا عرفنا الي أنت لاباس و قريت ولو شوية !!
هيا أش قولك كان توة نتحاورو شوية ؟؟؟؟
يا سيدي نأكدلك الي ردة الفعل متاع المدونين على تدوناتك ما عندو حتى علاقة بالكره ... ولكن طريقتك أنت في الكتابة (كان انجمو نسميوها كتابة ... خاطر هي أقرب للبروبقندا السخيفة تحت شعار قصّ و لصّق ) و رفضك القطعي للحوار أو حتى الرد على بعض الأسئلة والإستفسارات البسيطة, من خلال حذفك لإمكانية التعليق , هو الشيئ الي خلا ردة الفعل متاع المدونين تكون هكاكة (و الي عملتو أنتي يا سي نوفل ماهو إلا تأكيد للصورة الي عاملينها لأرواحهم كل "مناضيلي" حزبك ... رغم الي الحوار هو أسهل وأهم حاجة فالي تعملو فيه الكل !!)
سي نوفل ... أنت دخلت لعالم للتدوين (ما نعرش عن رغبة ذاتية و إلا بـ "تشجيع" و إلا بأوامر من شخص أو مجموعة أو مؤتمرٍ ما !!!) و تحديدا للبلوغوسفير التونسية ... لذا ننصحك يا خويا باش تقبل قوانين اللعبة و تناقش و تجاوب و ترد و تقبل النقد و تعبر عن موقفك وكان لزم حتى تتنرفز و ترفض و تندد ... و الكلو في إطار الديمقرطية و حرية التعبير و الإحترام المتبادل ... ننصحك زادة باش تكتب بطريقة معقولة و أكثر شخصية مالي تحط فيه توة (مش 20 تدوينة فالنهار ... أنا شخصيا ما يهمنيش مضمونها ولا القصّ و لصّق الي فيها ... أما شكليا تفقدك كل المصدقية ... 20 تدوينة فالنهار يا بو قلب ما يعملهاش حتى غرنديزر !!!!!!!!!) راهو الـ "تن ـ بلوغ" ولات عندها عادات و تقاليد ( نأكد على عادات و تقاليد مش قوانين !!!!) المدونين الكل ستانسو عليهم ... ما تنجمش أنت تجي توة تحب تنتمي للمجموعة من غير ما تعمل بعاداتها و تقاليدها...
ه
او نهار 25 ديسمبر عندنا يوم التدوينة البيضاء من أجل حرية التعبير ... آش قولك ؟؟؟ تره ورينا حسن نيتك ... ومرحبا بيك كان تجي معانا ... و هاو الجمعة هذي عندنا أسبوع التضامن مع الحوض الممنجمي أعطينا شنوه رايك في الموضوع ...ماك قتلي تنمية شاملة وكذا ... أحكيلنا عالتنمية مثلا غادي ...
هي ربي معاك و سايس روحك يا خويا