علاش في الرديف عباد هزّلها ديارها الواد ... و في بلايص أخرى عباد جايبا ديارها مالواد ؟؟؟؟؟
علاش في الرديف الديار طاحت بالمطر ... و في بلايص أخرى الديار طلعت بالماطري ؟؟؟؟؟
علاش صحافتنا تقول عالفيضنات "أمطارغزيرة تتهاطل" ... وعلى الي نشوفو فيه كل يوم ما تقولش " فلوس وسيارات تتـ...هامر" ؟؟؟؟
علاش صحافتنا تقول عالفاجعه "أمطارغير متوقعه تـُسقـِط المنازل" ... وعلى الي نشوفو فيه كل يوم ما تقولش " أوراق غير موقعه تبني المنازل" ؟؟؟؟
علاش في الرديف 2008 قالو على المطالبة بالحق في التنمية "شغب" ... وفي الرديف 2009 كي ضهرت حقيقة التنمية قالو "عجب" ؟؟؟؟
علاش الرديف حوض منجمي متاع فسفاط أكهو ... وبلايص أخرى منجم فلوس متاع سقـّاط أكهو ؟؟؟؟
علاش في الرديف بالضو مات هشام وبالماء ماتو عائلات (وهوما مخلصين فاتورات ماءهم وضوهم !!) ... و في بلايص أخرى بالضو تعملو بواتات وبالماء تعباو بيسينات (من غير ما يخلصو شيء!!!) ؟؟؟؟
علاش فالرديف القمم ما تبلعش الماء ... و في بلايص أخرى القمم ما تبلعش كان فالماء ؟؟؟؟
أتّـفـق تمام الإتفاق مع "قصة أونلاين" على وجوب التتبع العدلي لمجرمي الحرب هؤلاء ... رغم تأكدي من أن الضغط الأمركي على القضاء العالمي سيحاول قدر الإمكان أن يحول دون ذلك !!! لكن دعنا ننشر صور هؤلاء المجرمين فإن أمريكا لن تستطيع الضغط على التاريخ !!!ه
يبدو أنو موسم الفقاع (الشمبينيون) بدا على بكري السنا ... بالرغم الشتاء والطقس البارد هاهم طالعين بارتو فالبلايص الكل و خاصة في تن ـ بلوغ. بعد سي القزوردي ... هاو طحت اليوم بواحد آخر فاضت عليه الوطنية (الي بالمناسبة أحنا ما عندناش و ما نعرفوش حتى آش معناها) ... هو صحيح كي تجي تشوف البروفيل متاعو, ما ينجم يوحيلك كان بالـ "وطنية" الفياضة برا أكتب يا خويا و ربي يجيب القسم
التدوينة هذي كانت فالأول تعليق رد ا على تعليق خونا "نوفل مصري" الي سمح لروحو باش يعلق على تدوينة (هنا) متاع عاشور الناجي, رغم الي هو مسكّر عندو باب التعليق ... (تعليقو كان هذا : " موش نرمال كل ها الكراهية للتجمعيين ")
يا مرحبا يا مرحبا بسي نوفل !!!!!!! نشكرك على تواضعك و ردك ولو بكليمة على كل ما تكتب (والله هنيتنا تحيرنا و تفجعنا عليك ... قلنا بكشي المسكين أصابو مكروه و إلاّ مسيكن ما يسمعش و ما يشوفش !!!!) ... رغم أنو ردك لا يسمن ولا يغني من جوع ... أما أهوكا عرفنا الي أنت لاباس و قريت ولو شوية !! هيا أش قولك كان توة نتحاورو شوية ؟؟؟؟ يا سيدي نأكدلك الي ردة الفعل متاع المدونين على تدوناتك ما عندو حتى علاقة بالكره ... ولكن طريقتك أنت في الكتابة (كان انجمو نسميوها كتابة ... خاطر هي أقرب للبروبقندا السخيفة تحت شعار قصّ و لصّق ) و رفضك القطعي للحوار أو حتى الرد على بعض الأسئلة والإستفسارات البسيطة, من خلال حذفك لإمكانية التعليق , هو الشيئ الي خلا ردة الفعل متاع المدونين تكون هكاكة (و الي عملتو أنتي يا سي نوفل ماهو إلا تأكيد للصورة الي عاملينها لأرواحهم كل "مناضيلي" حزبك ... رغم الي الحوار هو أسهل وأهم حاجة فالي تعملو فيه الكل !!) سي نوفل ... أنت دخلت لعالم للتدوين (ما نعرش عن رغبة ذاتية و إلا بـ "تشجيع" و إلا بأوامر من شخص أو مجموعة أو مؤتمرٍ ما !!!) و تحديدا للبلوغوسفير التونسية ... لذا ننصحك يا خويا باش تقبل قوانين اللعبة و تناقش و تجاوب و ترد و تقبل النقد و تعبر عن موقفك وكان لزم حتى تتنرفز و ترفض و تندد ... و الكلو في إطار الديمقرطية و حرية التعبير و الإحترام المتبادل ... ننصحك زادة باش تكتب بطريقة معقولة و أكثر شخصية مالي تحط فيه توة (مش 20 تدوينة فالنهار ... أنا شخصيا ما يهمنيش مضمونها ولا القصّ و لصّق الي فيها ... أما شكليا تفقدك كل المصدقية ... 20 تدوينة فالنهار يا بو قلب ما يعملهاش حتى غرنديزر !!!!!!!!!) راهو الـ "تن ـ بلوغ" ولات عندها عادات و تقاليد ( نأكد على عادات و تقاليد مش قوانين !!!!) المدونين الكل ستانسو عليهم ... ما تنجمش أنت تجي توة تحب تنتمي للمجموعة من غير ما تعمل بعاداتها و تقاليدها... هاو نهار 25 ديسمبر عندنا يوم التدوينة البيضاء من أجل حرية التعبير ... آش قولك ؟؟؟ تره ورينا حسن نيتك ... ومرحبا بيك كان تجي معانا ... و هاو الجمعة هذي عندنا أسبوع التضامن مع الحوض الممنجمي أعطينا شنوه رايك في الموضوع ...ماك قتلي تنمية شاملة وكذا ... أحكيلنا عالتنمية مثلا غادي ... هي ربي معاك و سايس روحك يا خويا
خلقت طليقا كطيف النسيم وحرا كنور الضحي في سماه تغرد كالطير اين اندفعت وتشدوا بما شاء وحي الاله و تـمـرح بين ورودالصباح و تـنـعـم بـالنور انى تراه وتمشي كما شئت بين المروج وتـقطف ورد الربي في رباه كذا صاغك الله يابن الوجود والقتك في الكون هذه الحياه فمالك ترضي بذل القيود وتحني لمن كبلوك الجباه وتسكت في النفس صوت الحياة الـقـوي اذا ما تغنّى صداه وتـطـبـق أجـفانك النيرات عن الفجر والفجر عذبٌ ضياه وتقنع بالعيش بين الكهوف فاين النشيد واين الاباه أتخشي نشيد السماء الجميل أترهب نور الضحي في سماه إلا انهض وسر في سبيل الحياه فمن نام لم تنتظره الحياه ولاتخشي مما وراء القناع فما ثم إلا الضحي في صباه والا ربـيـع الـوجود الغرير يـطـرز بـالورد ضافي رداه وإلا أريـج الـزهور الصباح ورقـص الاشـعـة بين المياه والا حمام المروج الانيق يغرد مندفعا في غناه الي النور فالنور عذاب جميل الي النور فالنور ظل الاله
كنت تعرضت في تدوينة قديمة ( هنا ) لضاهرة الفرينة هذي , و قلت وقتها معاش باش انجم نشوف طحين بالجودة هذيكا , من كثر ما أبهرتني ضربة البندير البطايحي الي يضرب فيها هاك السيد متاع " القولف 7 " ... لكن ضهرت غالط في حسباتي جملة ... و ضهر الي الإبداع التونسي في عالم الفرينة و القفة و البندير لا حدود له.
السيد مولا الحانوت هذي حاجة من ثنين :
. يا إمّا يـبــيـع فالغبرة وإلا السلاح و إلا قاتل روح وإلا ما فهمتش آش عامل من خايب في حياتو باش تلز يكتب هاك الخرية حاشاكم.
. يا إمّا السيد هذا مقعار ياسر ووصل ل نيفو متاع تمقعير مزال ما وصلو حد.
على خاطر صعيب ياسر باش نصدق أنو إنسان ( وإلا حتى حيوان !!! ) هكة من طوع إرادتو لا طاح لا دزوه يقوم يكتب هكاكة على حنوتو للاه في سبيل الله ... ( و حتى كان جات جملة و تركيب صحيح !!!) زعمة يكونش السيد هذا في إطار حملة 4 نوفمبر قرّر باش يعبر بكل حرية ... وإلا يكونشي شسمو هو بيدو مولاها !!!!!!!!!!!!!!! ... يا ناس فهموني راني والله لعضيم تجوجمت ... فماشي شكون ينجم يفسرلي ؟؟؟؟؟؟؟؟؟؟
تلفزة بالملوان تـنصحكم باش تحطو كاس ماء بجنبكم قبل ما تشوفو التصويرة ,خاطر أنا والله لعبت عليّا الدوخة كي شفت هاك البلاكة !!!
أنزل عالتصويرة باش تكبرها وتتبلغم كيفما تبلغمت أنا
توه مدة وأنا نعاني من عقم تدويني فادح٬تلمت عليّا خدمة و مشاغل عائلية و خاصة بخل تدويني (الله لا تربحو!!!)، الحكاية هذي بدات فالصيف مبين سهرية و بحر و خدمة و عروسات و مرواح للبلاد, معادش تلقا الوقت حتى باش تحل الأرديناتور ... يكمل يخلط عليه رمضان و كل ما يتبعو من بخل و إنحلال فالنهار و سهريات فاليل ... لين الواحد ستانس بهاك التركريكة متاع المؤسسات الديمقراطية (كيما يقول توفيق الجبالي) ومعادش لاهي بالتدوين خلاص, ووفا رمضان والعقم التدويني ما حبش يوفا لين وليت نحس في روحي مقصّر ما نعرش في حق شكون, أما حاشم على روحي و أكهو ... نقول الناس الكل قاعدة تكتب و تعبروتنقد وتمدح و تندد وتتتتت ... وأنا نحس في إديا مكبّلة و مخي ناشف كي الصحراء الكبرى ... نسخايل روحي وحدي في هالمحنة ...
علاش مش نهار السبت الي تعدى نتفاهم أنا و الفري رايس (الي هو زادا يعاني تقريبا من نفس المشكلة) نهبطوا لتونس باش نحضرو للإفتتاح متاع "أيام قرطاج السنمائية" , وبالطبيعة حضرنا !!! هههههههههه ... (خليني ساكت خير ... هاك الحيط متاع برلين و التعزيزات الأمنية الي عملوهم كيلوماتر على المسرح البلدي يلزمهم مدونة وحدهم !!!!!) ... حسيلو قعدنا في قهوة مش بعيدا عالتياتر نشوفو بعينا و نموتو بقلبنا كيف الدخول للمسرح ولا كيما الدخول للجنة... و رُبَ صدفة خير من ألف ميعاد نتقابلو مع مسيو و مدام "قصة أونلاين" وعدينا سهرية نتصورها خير ببرشا من لوكان دخلنا للإفتتاح ... الحسيلو فتكم بالحديث ... من بين ما حكينا جبدنا على هذي حكاية العقم التدويني الي نعانيو منها و أكتشفت الي مش كان أنا نعاني من هالمشكل وجينا نحسبو نلقاو الي برشا مدونين عندهم مدة طويلة غايبين عالساحة البلوغسفيرية (بدرجات متفاوتة) وخرجنا بإستنتاج الي ممكن ياسر متفاهمين على إضراب جماعي شكون يعرف !! هيا سيدي هي شدو عندكم ... وهم الأتي ذكرهم :
طارق: بخلاف مقلاتو متاع جريدة العرب ... عندنا مدة ما قرينالوش حويجة فالصميم
الدوعاجي : بدرجة أقل أمّا الريتم طايح موش كي العادة , يمكن البرد غادي عامل فيه !! هههههه (مش صحيح الدوعاجي قاعد يكتب أما جوست حبيت نجبد معاه الشبوك ههههههههههه)
ايه عاد قلنا علاش ما نلموش رواحنا هالمدونين "المضربين عن العمل" و نعملو جلست عمل على دائرة مستديرة اناقشو فيها تردي الوضع التدويني متاعنا ... هيا مالا كل حد يقترح وين باش نعقدوها هالقمة (نعقدو دينمها 60 عقدة كي متاع النشرة الجوية !!) و يقترح تاريخ زادا ... فماشي ما نعلقو هالإضراب متاعنا.
PS :راهوا الدعوة مفتوحة للأصحاب الكل الي يهمهم الموضوع والي قعدين على الأقل شادين شوية ريتم متاع كتيبة كيمة أختنا عرب و خالتي هناني (يعطيهم الصحة) ...
