أجبد مالجابية و حط فالخابية

lundi 27 octobre 2008

إلى المدونين المضربين عن العمل

توه مدة وأنا نعاني من عقم تدويني فادح٬ تلمت عليّا خدمة و مشاغل عائلية و خاصة بخل تدويني (الله لا تربحو!!!)، الحكاية هذي بدات فالصيف مبين سهرية و بحر و خدمة و عروسات و مرواح للبلاد, معادش تلقا الوقت حتى باش تحل الأرديناتور ... يكمل يخلط عليه رمضان و كل ما يتبعو من بخل و إنحلال فالنهار و سهريات فاليل ... لين الواحد ستانس بهاك التركريكة متاع المؤسسات الديمقراطية (كيما يقول توفيق الجبالي) ومعادش لاهي بالتدوين خلاص, ووفا رمضان والعقم التدويني ما حبش يوفا لين وليت نحس في روحي مقصّر ما نعرش في حق شكون, أما حاشم على روحي و أكهو ... نقول الناس الكل قاعدة تكتب و تعبروتنقد وتمدح و تندد وتتتتت ... وأنا نحس في إديا مكبّلة و مخي ناشف كي الصحراء الكبرى ... نسخايل روحي وحدي في هالمحنة ...


علاش مش نهار السبت الي تعدى نتفاهم أنا و الفري رايس (الي هو زادا يعاني تقريبا من نفس المشكلة) نهبطوا لتونس باش نحضرو للإفتتاح متاع "أيام قرطاج السنمائية" , وبالطبيعة حضرنا !!! هههههههههه ... (خليني ساكت خير ... هاك الحيط متاع برلين و التعزيزات الأمنية الي عملوهم كيلوماتر على المسرح البلدي يلزمهم مدونة وحدهم !!!!!) ... حسيلو قعدنا في قهوة مش بعيدا عالتياتر نشوفو بعينا و نموتو بقلبنا كيف الدخول للمسرح ولا كيما الدخول للجنة... و رُبَ صدفة خير من ألف ميعاد نتقابلو مع مسيو و مدام "قصة أونلاين" وعدينا سهرية نتصورها خير ببرشا من لوكان دخلنا للإفتتاح ... الحسيلو فتكم بالحديث ... من بين ما حكينا جبدنا على هذي حكاية العقم التدويني الي نعانيو منها و أكتشفت الي مش كان أنا نعاني من هالمشكل وجينا نحسبو نلقاو الي برشا مدونين عندهم مدة طويلة غايبين عالساحة البلوغسفيرية (بدرجات متفاوتة) وخرجنا بإستنتاج الي ممكن ياسر متفاهمين على إضراب جماعي شكون يعرف !! هيا سيدي هي شدو عندكم ... وهم الأتي ذكرهم :


كيبيتز: هذاكا نسيت وقتاه آخر مرة كتب فيها

أكسكيزا : أحرف مني !! :)

برباش: من رمضان وروعة "حومة البلوغسفير" ما ريناهش, و على حد قولوا هو طارتلوا النفحة من جرت عباد ما تحشمش على رواحها

قصة أون لاين: لاهي في مشاكل كتابو و يدهن فالحانوت

وليد بن عمران : جاب ربي تونس لعبت معا فرانسا بش عمل طلة

القوفرنور متاع نورمالاند : كي هلال العيد !! هور سرفيس هالمدة الكل

أستوسا : فرد ريتم هيا والكيبيتز ... عمل فيها الفايس بوك

نوسترا : يضهر مرة في تبت يدا

أزواو : مالقلائل الي قعدو يكتبو , يكملو يبيراتيولو المدونة !! (الله يهلك من كان سبب)

جاكوب : قليل ياسر

نوفراج : بدرجة أقل ... أمّا توحشنا كتيبتها

الشنفرة : أنقرض بالحق كيفما الشنفرة, يعمل طلة بعد قداه كيف هلال العيد

مريومة من باريس : تكتب لكن مرت بفترة فراغ تدويني بريتم طايح

طارق : بخلاف مقلاتو متاع جريدة العرب ... عندنا مدة ما قرينالوش حويجة فالصميم

الدوعاجي : بدرجة أقل أمّا الريتم طايح موش كي العادة , يمكن البرد غادي عامل فيه !! هههههه (مش صحيح الدوعاجي قاعد يكتب أما جوست حبيت نجبد معاه الشبوك ههههههههههه)

البيق تراب بوي : غايب عندو مديدة

كلندستينو: والله وليت شاكك الي هو حرق بالحق !!!ه

براستوس: دراوين غبر!!!

حسيلو ... والقائمة تطول و تطول ...

ايه عاد قلنا علاش ما نلموش رواحنا هالمدونين "المضربين عن العمل" و نعملو جلست عمل على دائرة مستديرة اناقشو فيها تردي الوضع التدويني متاعنا ... هيا مالا كل حد يقترح وين باش نعقدوها هالقمة (نعقدو دينمها 60 عقدة كي متاع النشرة الجوية !!) و يقترح تاريخ زادا ... فماشي ما نعلقو هالإضراب متاعنا.

PS :راهوا الدعوة مفتوحة للأصحاب الكل الي يهمهم الموضوع والي قعدين على الأقل شادين شوية ريتم متاع كتيبة كيمة أختنا عرب و خالتي هناني (يعطيهم الصحة) ...

هيا نستنا إقترحاتكم فالتعاليق

20 commentaires:

  1. إي حطيتونا إنت و سي فري راس في العجة متاع الاضراب... أنا خاطيني مشني مضرب... بالعكس غاطس في العمل...

    أما فكرة المايدة مش خايبة... أتوة نعملوها في رديون... إتفقو بالمسبق على وقت.. المهم ما يكونش في تضاد مع يوم 4 نوفمبر

    RépondreSupprimer
  2. يا بالملوان توا هكا تعمل هالعملة؟ ما تتصوّرنيش قدّاش فرحت كيف ريت التدوينة و تحتها اسمك، مشيت طول صوّتلها من قبل ما نقراها... وراني و رحمة أمّى ديمة نتفكرك،
    هيا عودة ميمونة و راك خلّيت بلاصتك

    RépondreSupprimer
  3. هانى هونى ...........ايجاو مرحبا بيكم :))

    RépondreSupprimer
  4. اسّعا بصدق .. انا افتقدتك برشه يا بلملوان
    ثم اني انا بعدت مدّه بسبب شةيّة التزامات خاصة .. اما كي رجعت لقيتها مساطت شويّ..فمّه برشة مدونين ما لقيتهمش .. و فقدتهم .. و فيهم شكون بعثتلو ايميل نستفسر على المانع ورا غيابو
    ملاحظتك في بلاصتها..و ارجو انها تكون فاتحة لـ"عهد جديد" ... حتى هيّ عواشر
    ههههه

    RépondreSupprimer
  5. المشكل جماعي و ملم بينا الكل حالة و برّا

    RépondreSupprimer
  6. Chwaya mil 7ina w barcha min rtabet lidin...
    Nsit bach tahdi el tanit edhahabi lil tadwin l Mad Jerba. Bellahi es2lha ach 7atetelha bach tnajem t3abber ADSL...

    RépondreSupprimer
  7. أية سيدي هاني كتبت "حاجة في الصميم"... هكة تضيعلي في وقتي مع الحكايات متاع الصميم متاع وذني

    RépondreSupprimer
  8. http://tareknightlife.blogspot.com/2008/10/blog-post_27.html

    RépondreSupprimer
  9. هاهاها

    تو هكا لازم تفضحنا الكل

    و أنا كنت لاعب فيها ذكي كل مرة نلصق قصيدة و عامل فيها نعمر في هالكل المدونة المحنونة

    الله يهديك يا بالملوان

    هههه

    حاصيلو شماتة فيك إلما نكتب تدوينة غدوة

    هههه

    RépondreSupprimer
  10. هيّا الحمدالله عليك كي طلّيت...شفت شي مافيها ههههههه شنوّة حوالكم لاباس...فينكم....ما فيها باس ههههه آهو على طلّتك الباهية بوست... بالملوان يجبد في الشّبوك و نقعد ساكت...شدّ عندك ههههه

    RépondreSupprimer
  11. المدوّن مستانس يبرّد على قلبو من مشاكل و مشاغل الحياة بالكتيبة و التدوين أما يظهرلي الأزمة زادت تعمقت حتى طارت النفحة... حكاية اللمة هي الحل الأنجع للخروج مالعزلة و تعاون الجميع على تجاوز هالأزمة... آه يا عمّار بصحتك

    RépondreSupprimer
  12. belmalwene, haw étla3t 3andék mo3jbine barchaaa :)) ou talfaztek ma7bouba , wel inkita3 a3mal fil ness :))
    quand à moi ech bech inkolek :) inti adra ,3la kol lama avec les bloggeurs ne serait pas de refus!!
    :)))
    mala inti ya belmalwénou :))

    RépondreSupprimer
  13. @ Tarek : fikra bahia Radyoun 3al mawthou3 ... haya nbarmjoulou emmala

    @ Khalti Hnani: Rabi ykhalik nchalah, wallahi ca me touche vraiment ce que vous me dite

    @ Arabicca: a7na njiw men ghir mochkel ... ama 7ata enti n7ebouk tji !! haya 3ad a3mlelna moufjaa !!

    @ Brastos : merci beaucoup :)) w mabrouk ma 3malt ... w 3awda maymouna lik enti zeda :)

    @ khalil : za3ma t9oul ya khalil !!! mala het netna9chou fiha el 7kaya ... 3la radyoun kima 9al tarek wala 7ata net9ablou fi 9hiwa wala resto :)

    @ Walid: ahh oui 3andek el 7a9 Mad Djerba test7a9 wissem fakher w e3tizez 3ala eli tekteb fih :))) ... en fait jé donné des exemples ana w akahaw jété pas entrain de nomé tou le monde ... et justement de peur d'oublié qqun

    @ Chanfara : hihihhihih !! haya bayenlii !!!

    @ Walada : ya walada kifeh nensawek !!!!!!!! :)))))) ti 7ata fel mousalssal mta3 barbech enti ommna !! fama wa7ed yensa ommou :)))))) ... premierement enti tbarkalah 3lik 93adet cheda rythme mta3 tadwine hayel :) w deuxièmement ana rani 3atit des exemples ma thkartech les blogeurs el kol , justement bech ma nel9ach rou7i nsit 7ad ... w fama barcha des blogeur okhrine n7ebhom barcha w ma thkarthomech kima khouna Abounadem w werwolf w chiheb w enti .... el amthla hathoukom kenou 3ala sabil el thiker la el 7asser

    @ Dou3aji : hihihih !! wa7dek fel na9ch !! wel tma93ir wel blada wel rkeka ( c'est des compliments rahou !!!) hihihih

    @ werewolf : ahla bkhouia ti winek !!! oui mwaf9ek 3ala toul el khatt !! haya emala nbarmjoulha 93ida :)

    @ Exquisa : :)))))) hamdoulah alah yfawa7 el ri7a w ydawem ha ene3ma ... haya mala nbarmjou lama !! wala 9oul a7na ki el 3ada hihihihihiihihihihihi !!!!!

    RépondreSupprimer
  14. Moi aussi, je suis aux abonnes absents pour le moment :)

    RépondreSupprimer
  15. 5atini ma 3malt chay
    7abbit narja3 ndawen ya5i surveillant mta3 el blog 9alli jib billet d'entrée :-(

    RépondreSupprimer
  16. هايل ياسر... اسمي مكتوب

    أولا: تفاهمنا على لفظ نوصف بيه (على لساني) الشخص اللي خلاني نكره التدوين و نفد منو، أما كيف ظهرت ما تحبش الكلام الخايب في مدونتك، تو نستعملو عليه في مدونتي

    ثانيا: أي اكهو عاد، معناها هاني راجع

    هاني معاكم في جلسة العمل المستديرة، ما تنساونيش

    RépondreSupprimer
  17. inchallah hay wa9tech Ya tara9, 9a3dine mot7amsine el jma3a.

    3ala fikra hani rja3t m3a 7kaya jdida.

    Hay BN

    RépondreSupprimer
  18. ana rani mazzelt endawwen... ama ennafha mte3i belha9 tarett

    RépondreSupprimer
  19. ama mafeeha bess ken tetfakrouni bekleema... :-(

    RépondreSupprimer

علّق و ربّي معاك !!!! ه