Champignons mauve ... فقاع قزوردي

يبدو أنو موسم الفقاع (الشمبينيون) بدا على بكري السنا ... بالرغم الشتاء والطقس البارد هاهم طالعين بارتو فالبلايص الكل و خاصة في تن ـ بلوغ.
بعد سي القزوردي ... هاو طحت اليوم بواحد آخر فاضت عليه الوطنية (الي بالمناسبة أحنا ما عندناش و ما نعرفوش حتى آش معناها) ... هو صحيح كي تجي تشوف البروفيل متاعو, ما ينجم يوحيلك كان بالـ "وطنية" الفياضة
برا أكتب يا خويا و ربي يجيب القسم

حانوت الصفاء ... طحين بالخلاء

كنت تعرضت في تدوينة قديمة ( هنا ) لضاهرة الفرينة هذي , و قلت وقتها معاش باش انجم نشوف طحين بالجودة هذيكا , من كثر ما أبهرتني ضربة البندير البطايحي الي يضرب فيها هاك السيد متاع " القولف 7 " ... لكن ضهرت غالط في حسباتي جملة ... و ضهر الي الإبداع التونسي في عالم الفرينة و القفة و البندير لا حدود له.

السيد مولا الحانوت هذي حاجة من ثنين :

. يا إمّا يـبــيـع فالغبرة وإلا السلاح و إلا قاتل روح وإلا ما فهمتش آش عامل من خايب في حياتو باش تلز يكتب هاك الخرية حاشاكم.

. يا إمّا السيد هذا مقعار ياسر ووصل ل نيفو متاع تمقعير مزال ما وصلو حد.

على خاطر صعيب ياسر باش نصدق أنو إنسان ( وإلا حتى حيوان !!! ) هكة من طوع إرادتو لا طاح لا دزوه يقوم يكتب هكاكة على حنوتو للاه في سبيل الله ... ( و حتى كان جات جملة و تركيب صحيح !!!)
زعمة يكونش السيد هذا في إطار حملة 4 نوفمبر قرّر باش يعبر بكل حرية ... وإلا يكونشي شسمو هو بيدو مولاها !!!!!!!!!!!!!!! ... يا ناس فهموني راني والله لعضيم تجوجمت ... فماشي شكون ينجم يفسرلي ؟؟؟؟؟؟؟؟؟؟

تلفزة بالملوان تـنصحكم باش تحطو كاس ماء بجنبكم قبل ما تشوفو التصويرة ,خاطر أنا والله لعبت عليّا الدوخة كي شفت هاك البلاكة
!!!

أنزل عالتصويرة باش تكبرها وتتبلغم كيفما تبلغمت أنا

يسألونك عن الطحين ... قل نحن لمن المبدعين

ساعات الواحد يشوف إبداع طحيني تبنديري !!! هاك الّي حتى فالحضرة ما ينجموش يبندروه ... تبندير كي يسمعو الواحد تلعب عليه الدوخة و يجيه الغثيان و خواطرو اتدور ... هاك الّي من نوع "عمّال الشانطي الفلاني مع شسمو من أجل الديمقراطية و صبان الدالة (و في حديث آخر صبّان الصّبة)" ولا هاكي متاع "كركر مع شسمو من أجل تونس الغد" حسيلو شبعة شعارات و شبعة عبارات متاع فخر و نخوة (قدّاه تعيفني كلمة نخوة هذي ... اااخخخخ !!!! تذكرني في حاجة مش لازم نقلكم عليها) وإعتزاز وإمتنان ووفاء دائم وخيارنا الوحيد... إلخ ... إلخ

هال "فرينة" هذي (ولاّ بالعربية هال "طحين" هذا) تلقاوه جينيرالمون في شكل شليقة بيضا مكتوب عليها بالأحمر و"البنفسجي" ولاّ كي تبدا ضربة البندير أقوى تلقاها مكتوبة عالحيط طول ولاّ في أقصى الحالات و كي يبدى السيد "صاحب الطحونة" مهف و في سراه تلقاوها وقتها معاها تصويرتين ولاّ ثلاثة متاع تعرفو شكون و شوية "أريار بلون" (خلفية) متاع جبال و مراعي خضراء تترعرع فيها الأزهار و تغدو فيها الحياة ... و مطبوعة على قطعة بلاستيك كبيييرة قد الماهي, ثلاثة ولاّ أربعة برجكتارات يضويو فيها 24/24 كبااار هوما زادا, ينجمو يحققو الإكتفاء الذتي متاع التنوير العمومي في موريتانيا (في وقت الّي مشيحنلنا ريقنا بلوغة الإقتصاد فالطاقة و هذا موضوع آخر يطول شرحه)

هال الإبداعات هذي تلقاوها في أغلب الأحيان معلقة فوق شعبة...فوق إدارة عممومية...فوق شركة (تحب تكبّر بنيتها بلاش رخصة) في أقصى الحالات ........
أمّا المرة هذي الضربةجات قوية ياسر لين قعرت (بثلاثة نقاط فوق ال ق) البندير ... يوصل الواحد للدرجة هذي مالدناءة والطحينيزم !!!!!!!! حاجة عمري ما كنت نتصورها ... يوصل شخص عادي لاهو شعبة لاهو إدارة عمومية لاهو بانكة لاهو شركة خاصة (إتطرد فالخدامة تعسفا ولاّ هاربة مالفيسك) يبدع بالطريقة هذي في عزف منفرد من ضبط الإقاع و على سيارتو الخاصة زادا والله حتى بالتفدليك ما كنتش تخطرلي على بالي ... أنا ما نخبيش عليكم كي ريتها, إنتابني في نفس الوقت شعور بالعار والخزي والغش والردان وكل شيئ مع بعضو و تمنيت في لحظتها نعمل كوردا ولاّ تتشق الأرض و تبلعني أرحم ملّي نشوف حاجات كيما هكة ... حاسيلو أنا معاش أنجم نعلق أكثر من هكة و هاو خذيتلكم التصاور و أنتوما أحكمو وحدكم ...

السيد هذا إخترعلكم ال"قولف 7" الجديدة

أنزل عالتصويرة كان تحب تكبرها و تزيد تتبلغم

و كاتب أسمو زادا والله زايد "إذا لم تستحي فإفعل ما شئت" ه

أنزل عالتصويرة كان تحب تكبرها و تزيد تتبلغم