حكاية مهرّج السلطان..والإخوات والإخوان..وقصّان اللسان

توا عندي مدة ملي حليت هالمدونة هاذي و عملت أول بوست و من بعد قعدت ما كتبتش مدة (قعدت فالبث التجريبي الأول), وهاذا راجع لبرشة أسباب من بينها أني قاعد نحضر في برشى بوستوات (نقصد برشى تدوينات مش برشى سوتيانات... فقط لرفع أي إلتباس ينجم يحصل) فرد مرة باش نلقا هكاكا باش نعبي البرامج التلفزية متاعي ...
على كل حال مش هاذا موضوعنا الي تلزيت باش نكتب عليه اليوم (تو كل شي يجي في وقتو )
موضوعنا "سيّداتي سادتي" هي حكاية قريتها فالجارايد الهايلة مصلي عنبي متاعنا, و ما نجمتش نسكت عليها تالمون وجعتني ...
أنتوما الكل تعرفو " أعزائي المشاهدين" الي في قديم الزمان و سالف العصر والأوان كان سيدنا السلطان عندو هاك المهرّج متاعو يضحكو و يفرهد عليه كي يبدا سيدي متقلق وإلاّ منرفز من كثر الخدمة و مشاكل المملكة (ماكم تعرفو قدّاه السلطان عندو خدمة مسكين يبات الليل ما يرقدش لمصلحت الشعب و الرقي به إلى مصاف الشعوب المتقدمة بما فيه مصلحة البلدين الشقيقين...)
عاد سي المهرّج (الكلون) هذايا ساعة ساعة يحسّ روحو مسكين قرب وإلاّ تقرّب يااااااااااااااسر مالسلطان ومن قمر الزمان والأخوات و الأخوان, من كثر ماهو يضحّك فيهم و مشيخهم, ويولي مسكين يعطي فيهم الثيقة ميا فالميا ... و يتسيب صاحبنا فالتفدليك والتكوميك و التروكيك (واللهي ما نعرش هو يتسيب وحدو يتكومك وإلاّ هوما يلزوه, الله أعلم ما نعرش الحق, المهم هو الي جابها لروحو, باقي اش ملازو يدخل في هالدوالب متاع الإخوة والأخوات الي سمعتهم على كل اللسانات ...), و هوما باقي يضحكولو و هو ماشي و يزيد فالدوزة ... لين نهار مالنهارات و بحضور كل الإخوة والأخوات, يمسّ من هيبة السلطان ومن وقارو ومن شخصيتو المح...ترمة ... وهوا في بالو الجماعة معااااه وماهو إلاّ تفدليك في نطاق الترفيه عن النفوس ...
و ما يفيق و خينا الكلون كان بالصلفاق جاه من حيث لا يعلمون ... يمشي الراس في شيرة والفريسة في شيرة أخرى ... ويضربلها خونا المهرج المبجل متاع السلطان ما لا يقل عن العام حبس ...
و باش ما يضهرشي سيدنا السلطان ماهوش ديمقراطي و نغّار مايحملش التفدليك, يفبركلو حكاية لا عندها لا راس لا ساس باش يحشيه بيها فالحبس, أهوكا زعمه زعمه فما سبب مقنع شديناه بيه (وهذي حكاية ماهيش جديدة على سيدنا السلطان, فكل الشعوب تشهدلو في تلفيق التهم و تفبريك الحكايات متاع حي درابك) ... و تتلفقلو هاك المهرج مسكين تهمة من نوع "ويني الكاسكا الصفرة ؟؟؟؟؟" وإلاّ من نوع هاك الّي لقاوه خارج بكيلو سكر من عند العطّار, عداولو قضية "سكر واضح فالطريق العام" الحاسيلو أنا نقول الّي لا خير لا في هذا و لا في لأخرين, واحد مدخل يدو في فم لفعة و داخل في مداخل أقوى من طاقتو, و الأخرنغّار و غدّار وجماعتو , مالإخوة والأخوات مافيا الهم عافينا ما تنجمش تعطيهم الجنب.
برااااف أنا هاني حكيتلك وإنتي عينيك فيك شاهد الله عليك
تمت بحمد الله